नित्य अनिरुद्ध पौर्णिमा! (Nitya Aniruddha Pournima)

अनिरुद्ध पौर्णिमा शनिवार १डिसेंबर २०१२ रोजी आपण श्रीहरिगुरुग्राम येथे साजरी करणार आहोत. हा दिवस प्रत्येक बापू भक्तासाठी एक विशेष पर्वणी असते. हा दिवस आपल्या बापूंचा जन्मदिवस आहे आणि श्रद्धावानांसाठी, त्यांच्यावरच्या प्रेमापोटी आपले बापू संपूर्ण दिवस त्यांच्या मित्रांसाठी व्यतित करतात. जे मंगल आहे, शुभ आहे, जे प्रत्येक श्रध्दावानाच्या उन्‍नतीसाठी आणि उध्दारासाठी आवश्‍यक आहे ते ह्यादिवशी श्रद्धावानांना अधिक सुलभ व अधिक सहजपणे प्राप्त होते आणि म्हणूनच लाखोंच्या संख्येने श्रद्धावान ह्यादिवशी मिळणार्‍या बापूंच्या प्रत्यक्ष दर्शनाचा लाभ घेतात. श्रीरामरक्षा पठण कक्ष ही असतो. बापूंच्या देवघरातील श्रीराम, लक्ष्मण, सीता व हनुमंत ह्यांच्या मूर्तींवर अभिषेक करत असताना श्रद्धावान रामरक्षास्तोत्र पठण करतात. तसेच गार्‍हाणे ही घातले जाते. गार्‍हाणे म्हणजे आर्त अशी प्रेमाची हाक. आपल्या सद्गुरुला प्रत्यक्ष त्याच्याच उपस्थितीत अशी प्रेमाची साद घालण्याची संधी हा दिवस आपल्याला देतो. हा दिवस सर्वाथाने परिपूर्णच असतो. नामस्मरण, पूजन, अभिषेक, औक्षण, नैवेद्य आणि प्रत्यक्ष दर्शन अशी श्रद्धावानांना परवणी ठरणारा हा दिवस! ह्या दिवसाला "अनिरुद्धपौर्णिमा" असे नाव सौ. मीनावैनींनीच दिले. ही पौर्णिमा 'अनिरुद्ध' आहे कारण ह्याचा प्रकाश अनिरुद्धाच्या प्रेमाचा असा शीतल प्रकाश आहे, जो प्रत्येक श्रद्धावान भक्ताच्या मनामध्ये, जीवनामध्ये पोहोचतोच. दु:खाचे रुपांतर आनंद व धैर्यात करणारा हा प्रकाश आहे म्हणून मीना वैनी म्हणतात, "आता कैसी अमावास्या l नित्य अनिरुध्द पौर्णिमा".